స్థానిక సంస్థల అభివృద్ధి పనుల్లో మరింత పారదర్శకత తీసుకురావాలని రాష్ట్ర ఉప ముఖ్యమంత్రి Pawan Kalyan అధికారులను ఆదేశించారు. రాష్ట్రంలో జరుగుతున్న రోడ్ల నిర్మాణాలు, అభివృద్ధి పనుల పురోగతి, రోడ్ల పరిస్థితి ప్రజలకు ఎప్పటికప్పుడు తెలిసేలా ప్రత్యేక పబ్లిక్ డ్యాష్బోర్డు ఏర్పాటు చేయాలని సూచించారు.
పంచాయతీరాజ్ శాఖ, పంచాయతీరాజ్ ఇంజినీరింగ్ శాఖల ఉన్నతాధికారులతో సోమవారం క్యాంపు కార్యాలయంలో నిర్వహించిన ప్రత్యేక సమీక్ష సమావేశంలో పవన్ కళ్యాణ్ ఈ ఆదేశాలు జారీ చేశారు.
“స్వచ్ఛ రథం” తరహాలో గ్రీన్ షాపులు విస్తరించాలి
శాలిడ్ వేస్ట్ మేనేజ్మెంట్లో భాగంగా ప్రవేశపెట్టిన “స్వచ్ఛ రథం” కార్యక్రమం మంచి ఫలితాలు ఇస్తోందని పవన్ కళ్యాణ్ పేర్కొన్నారు. ప్రజలు స్వచ్ఛందంగా పొడి వ్యర్థాలను అందించి, అవసరమైన నిత్యావసరాలను తీసుకెళ్తున్నారని తెలిపారు.
తిరుపతి జిల్లాలో పైలట్ ప్రాజెక్టుగా ప్రారంభించిన “గ్రీన్ షాప్” విధానాన్ని రాష్ట్రవ్యాప్తంగా విస్తరించాలని అధికారులను ఆదేశించారు. గ్రీన్ షాపుల్లో పొడి వ్యర్థాలు అందిస్తే నిత్యావసరాలు పొందే విధానంపై విస్తృత ప్రచారం చేయాలని సూచించారు.
ఏప్రిల్ నెలలో స్వచ్ఛ రథాల ద్వారా 18.86 లక్షల కేజీల చెత్త సేకరించామని, వాటి విలువ సుమారు రూ. 3 కోట్ల వరకు ఉంటుందని తెలిపారు. ప్రజల్లో పరిశుభ్రతపై అవగాహన పెంచేందుకు ఈ కార్యక్రమాలు ఉపయోగపడతాయని చెప్పారు.
రోడ్ల పనులకు గడువు, నాణ్యతపై ప్రత్యేక దృష్టి
పంచాయతీరాజ్ ఇంజినీరింగ్ విభాగం ఆధ్వర్యంలో చేపడుతున్న రోడ్ల నిర్మాణ పనులు నిర్ణీత సమయంలో నాణ్యతతో పూర్తయ్యేలా చూడాలని అధికారులను పవన్ కళ్యాణ్ ఆదేశించారు. ప్రతి పనికి ముందుగానే గడువు నిర్ణయించి, ఆ సమయానికి పూర్తి చేసే బాధ్యత తీసుకోవాలని సూచించారు.
రోడ్ల నిర్మాణ పురోగతిని ప్రజలు నేరుగా తెలుసుకునేలా ప్రత్యేక డ్యాష్బోర్డు అందుబాటులోకి తీసుకురావాలని చెప్పారు. ప్రజల వినతుల ద్వారా వచ్చే ప్రతి రోడ్డు పనిలో శాఖ జవాబుదారీతనం కనిపించాలన్నారు.
రోడ్ల నాణ్యత విషయంలో ఎలాంటి రాజీ పడొద్దని, ఉన్నతాధికారులు తరచూ క్షేత్రస్థాయి పరిశీలనలు నిర్వహించాలని పవన్ కళ్యాణ్ స్పష్టం చేశారు.
స్వమిత్వ కార్యక్రమంలో సమన్వయం అవసరం
స్వమిత్వ కార్యక్రమం సమర్థవంతంగా అమలవ్వాలంటే రెవెన్యూ, సర్వే శాఖలతో సమన్వయం ఎంతో అవసరమని ఉప ముఖ్యమంత్రి పేర్కొన్నారు. శాఖల మధ్య సమగ్ర సహకారంతో గ్రామీణాభివృద్ధి కార్యక్రమాలు వేగవంతం కావాలని సూచించారు.
ఈ సమావేశంలో పంచాయతీరాజ్ శాఖ ప్రిన్సిపల్ సెక్రటరీ Kanthi Lal Dande, పంచాయతీరాజ్ కమిషనర్ Krishna Teja, పంచాయతీరాజ్ ఇంజినీరింగ్ విభాగం ఈఎన్సీ Balu Nayak పాల్గొన్నారు.
